EV KEVNE DINYA BÊ BEQA

Mela Ehmedê NALBEND

 

Ev kevn e dinya bê beqa

Êkî dewam jîn lê nema

Warê ğirûr û ehmeqa

Têda kesek dil hîn nema

 

‘Alem hemî jê çûne der

Pir qehr û kûvan û keser

Ya-l ber me hemya ew sefer

                Pawîz ket û havîn nema

 

Zêde nihû-d weqtê me da

Çaka ji rêzê xu veda

Çûn meqberê-l nav merqeda

                 Lew rahetîw teskîn nema

 

Ka murşidê rêka-b heqî

Wî kir wefat min dil peqî

Mejyê sera helya leqî

                Sed ax Behauddîn nema

 

Sed ax bo vê qehr û ğemê

Çû murşidê vê ‘alemê

Kes nîne sebrê xu-b demê

                Piştî kula rengîn nema

 

Ew kul ji bağê ewliya

Çûbû huzûra enbiya

Bû ğem li van deşt û çiya

                Kes bê ğem û nalîn nema

 

Ğewsê zemanê ummetê

Ellahî bir ber rehmetê

Nav enbiya û cennete

                Nûrha li weqt û hîn nema

 

Ew nûr hebû-l dîn û dunya

Faydê mûtî’ û dujmina

Qendîl û şewqa mumina

                Xelkê dil û texmîn nema

 

Ew Şêx Behauddînê bû

Der ta’et û temkînê bû

Babê kesê miskinê bû

                Hemd bo Xudê bê-şwîn ma

 

Ev ro-l cihî mes’ûdê ma

Palê riya me’bûdê ma

Ehlê selah û cûdê ma

                Teyare bê benzînê ma

 

Bo vê riya heq pale ye

L-ser ‘alemê teyyare  ye

Şewqa terîqê bo heye

                Wî-l dil çu kerb û kîn nema

 

Çak kêm hene zehf in xerab

Dinya li ser me bû ‘ezab

Me-d gel Xudê nabin çu cab

                Şewq û rewaca dîn nema

 

Ğalib me da dînê xu pişt

Hetka me çû ‘ara me rişt

Dil sût û qelya û birişt

                Êkî şeref şermîn nema

 

Fikrên xeşîm û munkira

Înkar kirin nûr û çira

Ma ez çi bêjim ey bira

                Êdî kesê sebrîn nema

 

Xelkê nema rehma dilî

Îlla ‘înadew jêk silî

Lew zêde bû mêlak kulî

                Fikrê kesê miskîn nema

 

Weqtê ku şêxî kir wefat

Xuşya me çû îqbal nehat

Şeytanê her se’yû xebat

                ‘Umrê me bê nifrînê ma

 

Ev hinde qewm û nahiye

Çû-j nav me ev ronahiye

Ka fikre dil xuşek kiye

                Êkê geş û şewqîn nema

 

Şêx çû-l me rabû fertene

Hat ser cihî ev barrene

Ğalib niho rê berzene

                Ehlê ‘eqil keyfîn nema

 

Şêx paleê dînê me bû

Dinya me jî-b wî zêde bû

Ev ro li pêş meberze bû

                Neqqaşê neqşê çîn nema

 

Kit kit niyas û taliba

Got wey xuzî roja me ba

Û ğeyrî wan jî ğaliba

                Bê naliyû axîn nema

 

Ev ro murîd û têkela

‘Umrê hema qehr û bela

Got em çi mayne mubtela

                Ku ew durra nûrîn nema

 

Şola Xudê her çaki ye

Mes’ûd li-şwîna şêxi ye

Î’lanke Ehmed ew çi ye

                Ew bû kesê kerbîn nema