Şa‘irek Me Yê Klasîk Sibxetullah û Helbesteke Wî

Şa‘irek Me Yê Klasîk Sibxetullah û Helbesteke Wî

Tehsîn Îbrahîm Doskî

Sîbxetullah navê şa'irek me yê klasîk e. Me zêde agahî di derbarê wî de nînitin. Tenê şi'reka wî me di destnivîseka kevin da dîtîye ku keşkoleke gelek şi'rên Kurmancî tê da hene wekî şi'rên Herîrî, Xanî, Bateyî û…hwd. Çend şi'rên farisî jî di evê keşkolê da hene. Dîroka nivîsîna vê keşkolê dîyar nîne lê bi nîşanan em dikarin bêjin ku despêka eve destnivîsê bo sedsala nozdê zayînî yan berî hingê dizivirit. Lew em dibêjîn, ev şa'irê me her çu nebit berî dused salan jîyaye. Mimkûne ku ev şair Seyyît Sibxetulllahê ‘Erwasî bit.

Sîbxetullah di vê şi'ra xwe da dibêjit:

 

Îro li ser belgê gulê

Zulfan ji 'enber dav veda

Her ro xîyalek tê milê

Bayê şemal lê kir belav

 

Bayê şemal belav kirî

Me'şûq ji ber winda kirî

Gerden bi 'enber werkirî

'Aşiq dibû lê pir belav

 

'Aşiq dibûme lez li nar

Dunya digirtî çar kinar

Xem lê dibûne sed hezar

Li-zulfan dibit sêsed silav

 

Tayê di nazik sunbul in

Serdarê xalan fulful in

Qumrî di burcan xulxul in

Zaxan li baxan girtî dav

 

Zaxan li bax dav girtine

Me'şûq ji rengê sosin e

Dunya li min bû dujmin e

Seb xatirê gerden zirav

 

Baxê binefş û sorgulan

Sosin li dora sunbulan

Awaz û dengê bilbilan

Dayîm hizar deng tên ji nav

 

Dayîm dikim şukrê Xwudê

Min xew nekir hetta subê

Lewra dibe carek ji bê

Ew nazika bi xûbî bi nav

 

Wax şîn û bî Mecnûn kirim

Ay dê û vê mehzûn kirim

Ah dal û bê ez dîn kirim

Wellah nîhayet min şefav

 

Dayîm hezar deng tên ji dil

Sed deng û deng min tên ji dil

Firyad û ahîn tên ji dil

'Işqê li min suhtin hinav

 

'Işqê bi min sewdakirî

Me'şûq ji min cuda kirî

Ew des li ser me dakirî

Ew nazika ehkel bi nav

 

Min her bi nar û pêhte dil

Berqek ji palan rête dil

Gava disot hinav û dil

Ew qameta bejna zirav

 

Ew qameta bejna tenik

Hûrî û wildan bêne nik

Fîlhal di ber da bin jinik

Şox û şepala ser zirav

 

Şox û şepala surrperî

Ebrû sîyeh leb şekkerî

Dêm zuhre ye ez muşterî

Her telbekar im weqt û gav

 

Her telbekar im gav û weqt

Leb şekkera şirînsifet

Carek li min şefxûn biket

Pêlek biçim gavek silav

 

Pêlek zîyaret çin tewaf

Şibhê wê nînin qaf bi qaf

Zemzem ji yaqûtê şefaf

Can dê bibexşim şubhî av

 

Can dê bibexşim dilberan

Ger dil bidet ber xenceran

Ji destê zîv û esmeran

Birîn di dil da man tevav

 

Ji destê şirîn û nazikê

Rimbaz û tîr endazekê

Kuştîme gerden gazikê

Min şikestî ye ejn û gav

 

Min şikestî ne gav û qedem

Dûsaxê 'işqê la cerem

Gulçîçeka Baxê Îrem

Yek yek kirin misk û gulav

 

Zulfêt ji lewnê sosinê

Alal û beybûn in binê

Mawerd û nesrîn in tinê

Ji kupkan girtin xunav

 

Zulfêt sîyeh mawer kirin

Hem tîj wekî xencer kirin

Hem misk û him 'enber kirin

Hem jî civandin nav nav

 

Derya û qaf û qulzemîn

Dil cewhera cama mubîn

Îro melaik jî emîn

Ew bû û vê hatin bi nav

 

Ew “sad” û “bê” ismê me ye

Ew “xeyn û “tê” pêra “he” ye

Muttesilî bi cismê xwe ye

Hêvî heye ew sîne sav

 

Hêvya wî Rebbê 'alem e‌

Tek rabe ceyş û heşem e

Ew res bibe ser 'Ecem e

Jorda bike ‌ji hev tar û mar

 

Wê hatî Îbnû Esfer e

Em gerîyan der bi der e‌

Himmet bike Pêxember e

Jorda melaik bêne xar

 


Ê Berê Weqfa Kerwana Umudê li Fîlîpînan xebata alîkarîyê da destpêkirin
Ê Li Pey Bi Guhê Qelbê Xwe Godarî Bikin Û Bi Çavê ‘Eqlê Xwe Binerin

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.