DUNYA DEREWÎN

Article

Gelî dost û hevala dilê min pir nexeweş e
Betilandîw bê hal im li dor min mişeweş e
Guhdar bin wa birano çi hebûnek serxweş e
Bi gilî û gazin im ka werin suhbeta min

 

Dest davêjim kîjanî li ser dil bû keder man

Kufr û zulma vê dewrê tijî kir erdû ‘ezman

Ji alîkî dinhêrim ev derdê mey bê derman

Bi sed sala dewam e zêde ye heyreta min

 

Ji alê din di bînim di nav me de neyarî

Her yek ji me li a xwe dinhêre çav şîyarî

Ji wehdeta îmanê çê nabe pirsîyarî 

Brîna min şewat e têk veda hesreta min 

 

Cema’et û terîqet meşreb û bend û celeb 

Bi nav xizmetê hebûn belê ne heqq e teleb

Geleka em di bînin ya bi menfî’et sebeb

Yan bi hesab şuhret in ne bona kulfeta min 

 

Me fam kir rêberê wan hawil û xapa dikin

Hinek bi zanebûnî têkilî dor wan dibin

Pur kesên bi koranî çima li pey wan diçin

Ji ‘edl û heqê dûrin naêne ulfeta min  

 

Xweda zane van kesan ne şêx in ne mela ne

Şelaq û qirdikên dor ewan dikin ağan e

Yan frotîw xayîn in ya hin ji wan vala ne

Di fikrim ez halê wan sebebê ‘uzleta min 

 

Li ba xwe ew dibên qey kes nizane halê wan

Hîlebazî û xap in em zanin tevgerê wan

Bi neheqî ma'mele dikin ev e karê wan

Dengê heq na bihîzin ev sebeb ğurbeta min 

 

Ey kesên renge yarî xerabên bi dil neyar

Ew lîsê we zeft kirî ji wer daîm na be yar

Ne bawer bin li dinê hûnê ji wir neyên xwar

Ez di bêjim li vê der ha ev e qebheta min

 

Şev û rojên bi jimar zû tên û çûn di borï

Hê li zemîn hîsabek pêş zordesta bi zorî

Heye bela bin ji hev dezgê hîlê bi dorî

Neheqî ji kêr maye ranake ğeyreta min 

 

Evan bê qîmetên çep û çovikên destê wan

Li her der û her weqtê yek in nîne rastê wan

Îro ‘alema Îslam ketîyê nav destê wan

Ji bo ummeta mezlûm tev rabû şefqata min

 

Di nav hîzb û sefê heq hinek nehêja hene

Ne layîq in cî digrin li ba xwe qerase ne

Mani'ê pêşveçûnê ev gotin ji bo we ne

Perda rûyê we xwezya rojekî daxista min 

 

Ji bo çûnê em hatin evê dunya ha fanî

Kesên bê heqanîyet bi zorê diçin banî

Carna xweng û bira ne li hevdû bi koranî

Di bin de tehdê dikin radikin sosreta min

 

Ev dunya ha derewîn min kal û pîr kir gelek 

Sal û zeman derbas bûn zîvirîn çerx û felek

Tevgera jîyana kor di sityê min de xelek

Qudûmêm nîne rabim ji dest çû qudreta min

 

Xeyalên nêzîk û dûr ne giham şadîmana

Bi heqîqet bi rastî jîyanek ka çima na

Ku min xeberda ez bûm pizika ser zimana 

Ji tineyî derdê me gelek e kesreta min 

 

Çar âlî dora min girt evî derdî ez xwarim 

Zêde ye kedera min ji dil bi ah û zarim 

Min dêşîne ev xesim welleh ez pê nikarim 

Bi nav ğerîb û ‘evdal bela bû şuhreta min

 

Şol ket destê ne ehla hukmê rastîyê hilat

Derew bi qedr û qîmet pal daye serê civat 

Mirarê bi reng zindî ka xweşî çima ne hat

Di nav sênc û kavila hunda bû rûmeta min

 

Çiqas min rastî meşand li astenga qelibîm

Min berê xwe da heqiyê ji kostenga fetilîm

Ji dest ğemsarên gendel li heyatê betilîm

Min dest ji dunyê berda bes neçe axreta min

 

Li dîwanê tenê mam bê dost û yar û heval 

Derketim seyda bayê digerim deşt û newal

Asîman teng e li min ev ‘umrê min bû zewal

Nivîskarê rojê me xweştir e xelweta min 

 

Cumle di şubhê şevê ev dunya bê wefa ye 

Di çavan awr û tavî min qet nedî sefa ye

Ah û enîn xencer in di sênga min cefa ye 

Li stêrka di bezim çê nabe dewleta min 

 

Li ber çavêm biketa carek pêjna sermedî

Ji nûra te birevya bêbextî û şemedî

Vebûna bostanê me gula sora Ehmedî

Bi tevî hebûna xwe li berê raxesta min

 

________________________________________

Mişeweş: Karmaşa

Celeb: Grup 

Hawil: Hile

Ulfet: Alışma, kaynaşma 

Qirdik: Maskara 

‘Uzlet: Toplumdan uzak 

Çovik: Sopa,  değnek 

Şadîman: Mutluluk 

Kesret: Çokluk, derdin fazlası

Asteng: Güçlük, zorluk

Kosteng: Köstek 

Gendel: Hantal,  pasaklı 

Sermedî: Ebedî 

Şemedî: Uğursuz 

Di debarê nivîskar de

Têhev

19

Gotar

Ê Berê Çibikim ji Dunya Xalî
Ê Li Pey MESELA ME VAN BIÇÛKA

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.