HOSTÊ DÎWARA

Hey lo hostê dîwara 

Kevir hildab berwara
Li ser lod û kewara
Ta alifê dewara

Hela bîna xwe berde
Çayek teze bi serde
Wan qedeha têwerde
Qet nebêje di berde

Xwezya ewan şagirta
Bennik mezro bigirta
Kefik çakûç hilgirta
Bi xerç navrek dagirta

Palde li ber sederê
Ji eywan û deverê
Guh bide vê xeberê
Ma kar naçe seferê

Mêzîna dîwarê te
Lêkirna her carê te
Qebalew tev barê te
Ma neb şakûl karê te

Madem dibêjî rast e
Firavîna te b-mast e
Sênîka xwe alaste
Guhdarke gelî hoste

Mêzîn çawa şakul e
Heyat bi çi maqûl e
Bi Muhammed Resûl e
Yan na pûç û kaşûl e

Ey hostê qenc zana zor
Dîwarê te qor bi qor
Lêkirna te hawîrdor
Lê danî mesterew mor

Kevrê çengê te ‘edland
Weka neqşê niqirand
Çiqas bi zexm te lefand
Te navê xwe biriqand

Heger te çaydanka xwe
Danîbe ber çoka xwe
Berî vexwarina xwe
Guh bide birakê xwe

Îja sînorên Xweda
Li ber guneha tevda
Dîwarin weka benda
Ji bona hemî ‘evda
 
Bendin hemî j-îmanê
Ji bo neke ziyanê
Dûrbej zulmê l-cîhanê
Paqij herî mîzanê

Heyfe em nakin debir
Ber derbê pîjik kevir
Îja d-‘ezab û agir
Kî kare bike sebir

Ey gelî xwendevana
Maqûl û sermiyana
Dost û nas û mêvana
Hoste bese bi vana

Herçî hazirê civat
Ji her aliyê welat
Li Muhammed di heyat
Dekam bînin selewat