HEYAT PÊ NIMAJ RIND O

Article

 

 Merdum pê nımaj fam keno ki ebdê Homayi yo, her lehza huzurê Homayi dı yo u Homa her lehza yi vineno. Ino weziyet, fam u qeweto manewi ê xu xırabi ra pawıtış dano merdumi. Pê yo emır ruej panc wexti huzurê Homayi dı vındertış yo intizamo bêqusur ano meydan. Ina saye dı hem heyatê şexısi u hem zi heyatê şari istiqamet ser dewom keno.

Pê cemaet nımajkerdış, piya cuyayiş u yobinon ri desteg keno zıxm. Şınasname, mewqi u meqamê cı çıta beno wa bıbo wext merdum eyni saf dı vındert, huzurê Rebê xu dı şı ruku u secde bı heqiqet u bı kerden fam keno ki derecaya pili teyna pê teqwa kıfş bena. Ino hal, dermanê fexır u kibiri yo.

“(İnan) Va: Ya Şuayb! Gelo nımajê tu tu ri emır keno ki ma mabudonê babiyonê xu ra fek raverd u zerra ma çıta wazena ma nêeşk pê malê xu ay bıker?” (Hûd-87)

Bınateyê mumin u kafıri dı ferqo tor pil nımaj o. Nımaj yo kerdena tewhidi ya. Gereka nımaj merkezê heyatê merdumê mubeliğ dı bo. Wext behsê mubeliğ bıbo gereko o hê vêr pê nımajê xu biyero virê merdumi. Wext holi ser venda şari gereka şar fam bıkero ki ın vendayiş neticeyê nımajê ê merdumi yo.

“Keyeyê xu ri nımaji emır bıker. Tı zi nimajê xu dı daimi bı u ser vınder.” (Taha-132)

Qıconê xu zey warısê secadeyê xu pilkerdış wezifeyê ma heme dadi u babiyon o.

Nımajkerdış u keyeyê xu ri nımaj emırkerdış u musnayiş, pê vengê azoni piya nımajkerdış u bı ıno qeyde tabiyê emırê Homayi biyayiş famê iteati zêdneno. Ina çarçiwa dı beno sebebê estunan keyeyi dadi u babi ri iteati.

İnsan hol bo keye zi beno hol,

Keye hol bo şar beno hol,

Şar hol bo dewlet zi bena hol.

Rayirê ına holi, Kitabo ki ma ri wehiy biyo ey wendış, ey famkerdış u ey heyatê xu dı tetbiqkerdış u nımaj bı şıklo raşt kerdış o. Heto bin ra nımaj merdumi bêari ra paweno. Heme xırabiyi ki eyro semedê keye raşayiş erziyayi meydan qey ıni xırabiyan ra xu pawıtış nımaj yo sıtare u mıhafaza yo.

“Raşt ra mumini resayi xelas, yi nımajê xu miyanê huşu dı keni.” (Mu’minun 1-2)

“Heta zerra merdumi zi zey wucudê ey nımaj dı nibo Homa nêoniyeno o nımaj ra.” (Hadisa şerif)

Nımaj wasıtayê xelas o u resayişê holi yo. Nımajo ki merdumi xelesneno, o nımaj pê xuşu yeno kerdış. Mumino ki nımajê xu miyanê huşu dı bıkero, huzurê azamete Homayi dı ecziyetê xu fam keno. Es-Samedo ki qet mıhtacê çik niyo la heme çi mıhtacê yi yo huzurê yi dı cewabê heme ihtiyaciyanê xu vineno, beno rehet u reseno huzur.

Nımaj teyna xu qerqelnayiş u tigêrayiş niyo. Nımaj duaya tor pil, işareto tor pil ê ebdi, yekunê heme nımajan o. Nımaj zey edeti kerdış, mena ra vetış u teyna yo şıkıl pay ra verdayiş zerr dı zırar dono nımaji. Lazımo satıhê ummet dı her het ra cehıd bıbo u pê gamanê zıxman vera ıni tigêrayişanê ifsadi pê azim u ixlas mucadele bıbo.

Talebeyi tor pili ê Hz. Muhammedi (aleyhi selatu ve’s-selam) eshabê ey i. Nımajê yin zanayiş, qıymetê Hz. Muhammedi dıma nımajkerdış zanayiş o eshabo ki pêxemberi dıma saf gırıdawa yin dır saf gırıdayiş o.

Merkezê heyatê Resulê Homayi dı nımaj u merkezê şarıstan dı zi Mescid bıbı. Ruejê ey nımaji guerı bı. Ma gereka semedê heyatê rındi ına misal eyro heyatê xu dı biyari ca. Gereka planê mehlayan u şarıstanan guerê ıno modelo Nebevi bi.

İnsan yo mexluqo wayirê aqıli yo. Semedê insani terbiyeya irade şert a. Ge miyanê honê şirıni ra wıriştış ge kar u gureyê xu war verdayiş u verê xu Homayi şayiş u ınay her ruej panc dori tekrarkerdış: Hındeyê ınay yona çi nêeşkeno merdumi hındêk hol terbiya bıkero. Homayi (azze ve celle) “Mı cıni u insani qey mı ri ‘ebdtikerdış vıraşti” (Zariyat-56) emir kerdo u sebebê insani vıraştışi beyan kerdo. Ina ebdti dı ibadeto tor muhim nımaj o ki Mirac dı biyo farz u Hz. Pêxemberi zi qey yi vato “rueşnayiya çımonê mı.” Kam qıymet bıdo nımajê xu qıymet dano dinê xu.

Hedefê ma, ıno emrê Rebê xu her seraserê heyatê xu dı caardışo: “Vac: Nımajê mı, (hec, umre u ê bini) ibadeti mı, heyatê mı u mergê mı qey Rebê Alemon Allahi yo.” (Enam-162) Hedefê ma ın emrê Rebê xu caardışo: “Merdumo ki (insanan semedê ibadet u itaat) vendo Allahi, kar u gureyo salih bıkero u vaco “bêşık u şubhe ez bısılmonon ra yo” qıseyê yı holiyeri qıseyê kami esto?” (Fussilet-33)

Duaya ma, duaya ki Homayi fekê Hz. İbrahimi ra ma musnayi a duaya:

“Ey Rebê ma! Mı u nesla mı êyi ki nımaj pê heqê yı ani ca yin ra bıker. Ey Rebê ma! Duaya mı qebul bıker.” (İbrahim-40)

Ino sebeb ra, ma çarçiwaya şiarê “Heyat pê nımaj rınd o” wazeni hişê heme muminon bıonc heyat u nımaj yobinan ra ciyanibeni ser.

Heyat pê nımaj rınd u heyat o.

 

Di debarê nivîskar de

Têhev

21

Gotar

Ê Berê SUREYA NAS
Ê Li Pey

Şîroveyên ku tên nivîsandin ne nerîn û fikrên me ne û bi tu awayî me temsîl nakin. Berpirsiyarê şîroveyan kesên ku şîroveyê dike ye.