Dil Bi Kul im

Îbrahîm Xoce (Kızmaz)

 

Ya Rebbî ey ya Îlahî! Dil bi ğem im dil bi kul im

Ji derdê neqenc û zaliman dil birîn im bilbil im

Di nîvê bexçê te de ez bê huzûr im, ez bê gul im

Dixwazim bighînim te qîr û hewar û gilyên xwe

 

Ya Rebbî ey ya Îlahî! Te xuluqand însaniyet

Te wan veqetand û weşand, kir qebîle û ‘eşîret

Ji bona ku hev nasbikin têxne nav xwe unsiyet

Û her qewm raje emrê te, bike şop û rê ji bo xwe

 

Ya Rebbî ey ya Îlahî! Em hatin hîlên şeytanan

Qewmiyet kirin sebeb neyartî û tefrîqa însanan

Kirin pêç û parçe temam memleketên Muslumanan

Kirin pariyê bi lezzet û danîn ber xwe luqmên xwe

 

Ya Rebbî ey! ‘Ebdên Te de’wa Rebbîtiyê li me kirin

Avêtin hukmê Şerî’et qanûn ji ba xwe çêkirin

Şêx Se’îd û emsalên wî ku li ber rabûn qetilkirin

Bihitandin milletê me hin ji me kirin kûçikên xwe

 

Ya Rebbî ey! Em danîne ser sêla sor peritandin

Ji me ‘izzet û şerf û cesaret tev xeritandin

Dane ber darê Romiyan nema bihêlin şewitandin

Kûçikên xwe danîne ser serê xwe kirne wekîlê xwe

 

Ya Rebbî ey ya Îlahî! Em Kurd gelek reben hiştin

Çiqas me rakir de’wa te bi sed hezaran ji me kuştin

Şêx û ‘alimên qenc qelandin bênamûs li nav me hiştin

Ji ber destê van bel’eman em nikarin rakin serê xwe

 

Ya Rebbî ey! Hin jê bûn şêx, hin bûn mezin, hin bûn ağa

Em kirin rebenên nav şekalan, kûçikên nav firaqan

Konên xwe danîn meydanê li nav van baxçe û bağan

Em anîn ser çokan temam kirne ğulam û ‘evdên xwe

 

Ya Rebbî ey! Bê çare me gilyê xwe bikim li ba te

Hîzba Xweda çima ku rahişte doza te, de’wa te

Zalim kirin hedef, rabûn bi destûra Qurana te

Davên nav piyan wan zalim û bel’em fenn û dekkên xwe

 

Ya Rebbî ey! Bes e ev pîkola muşrikan li ser me

Me pir ‘eyb û ‘ar e ev hal li huzûra te me pir şerm e

Heliyan xwîn û goştê me nema-j mer hestî û çerm e

Me rebena bavêj rêça Sunneta Pêğemberê xwe

 

Ya Rebbî ey! Kufr û zulmê bi milletê me bide zanîn

Razî neke bi van qanûnên kufrê ku-l ser me danîn

Bide dîtin gelo dost û dujminên te kî ne kanîn

Da vegere ev milletê mehrûm bide te berê xwe

 

Ya Rebbî ey ya Îlahî! Şeş topan karke bi rê xe

Tevan ser çavên şêx û melayên hevalên kufrê xe

Raje rayên şirk û kurfrê ji nav me hilke li erdê xe

Bi destê hizba xwe bimeşîne li ser mulkê xwe hukmê xwe

 

Ya Rebbî ey! ‘Aliman ji me-r çeke bike pêşevan

Me xelaske ji van melayên bi nav ‘alim, gurê şivan

Cilên wan cilên enbiya lê qelbê wan qelbê şeytan

Hîdayetê bide wan jî, wan bavê deryê rehma Xwe

 

Ya Rebbî ey ya Îlahî! Em Kurd temam ‘Evdê te ne

Me tovê hukmê Te  avêt cotkariyê erdê Te ne

Wek tirha nû şîn dibe dibeze bal emrê Te ne

Me dar û ber çikand, dan pey Mûhemmed Rêberê Xwe

 

Ya Rebbî ey ya Îlahî! Ger Tu bikî muwafeqet

Em Kurd rajin tarîtiyê parçe parçe, bikin qet qet

Emê rayê wê hilgirin bavên vê cehaletiya seqet

Nahêlin qet li ‘aleman ser rêça Te-l hemberê xwe

 

Ya Rebbî ey ya Îlahî! Emê senceğa Te-l mil kin

Esasê van qanûnên şeytanan ji nav qewman hilkin

Kezeb û dilê tağutan bibirêjin, qul qul bikin

Van milletên mezlûm tevan bikin dost, bikin birê xwe

 

Ya Rebbî ey! Emê riya te bikolin bi derziyan

Xwe derxin ji bin sîha van bel’eman, van çavpeqiyan

Hûrik hûrik bidin xwendin bighîjînin em feqiyan

Bighîjînin, bifirêxin, bidin pêş xwe ‘almên xwe

 

Ya Rebbî ey ya Îlahî! Emê bakine qewman bînin

Hûrik hûrik, tene tene-j Quranê emrê te deynin

Ji ber de emrê Sunneta Pêğemberê te meyzênin

Hê nû emê di huzûra Te rûnêne ser çokên xwe

 

Ya Rebbî ey! Tu zanî ku riza Te ye de’wa me tev

L-hev digerin bi şev û roj, b-zor û zehmet, em tev û hev

Devê Bîlalan tu caran nasekine nakeve hev

Ji bo Tu wan qebûl bikî ber deryê merhemeta Xwe.